Garðar Gunnlaugsson var hetja Skagamanna gegn Stjörnunni í dag, en hann kom inn af bekknum og skoraði jöfnunarmarkið, 1-1.
"Við höfðum trú á þessu allan tímann. Þetta var vel gert hjá okkur," sagði Garðar glaðbeittur við Vísi eftir leikinn.
Stjarnan var betri aðilinn í dag en Skagamenn gáfust ekki upp og uppskáru jöfnunarmark þó heppnin hafi verið með þeim þegar Halldór Orri skaut í stöngina úr vítaspyrnu.
"Þeir fengu sín færi en við börðumst og hættum aldrei. Það var mikill kraftur í okkur og karakter að koma til baka," sagði Garðar.
Markahrókurinn vissi að boltinn væri á leiðinni í netið um leið og hann skaut, en hann fékk sendingu í gegnum vörnina frá Jóni Vilhelm Áksyni og afgreiddi færið sitt vel.
"Ég fann það bara þegar ég hitti hann að ég var að fara að skora. Þetta er eins og í golfinu; maður veit að höggið er gott um leið og maður slær," sagði hann.
Garðar er að koma til baka úr meiðslum en hvenær verður hann klár í að spila 90 mínútur?
"Vonandi bara í næsta leik. Gulli verður að taka ákvörðun um það samt," sagði Garðar Gunnlaugsson.
Ísland
Ísrael
