Mótmæla við rússneska sendiráðið

Um sextíu til sjötíu manns eru nú við sendiráð Rússlands á Garðastræti í Reykjavík. Þau eru saman komin til að sýna samstöðu með meðlimum rússnesku pönkhljómsveitarinnar Pussy Riot.

Þrír meðlimir hljómsveitarinnar bíða nú dóms en þeir voru ákærðir fyrir guðlast og óspektir eftir að hafa sungið mótmælasöngva í dómkirkju í Moskvu.

Dómurinn verður kveðinn upp fyrir hádegi í dag.

Málið hefur vakið gríðarlega athygli víða um heim og hafa listamenn og áhrifamenn lýst yfir stuðningi við stúlkurnar þrjár sem nú bíða dóms.