Innheimtur upp í Icesave aukast um 19 milljarða

Skilanefnd Landsbankans telur að 1175 milljarðar muni endurheimtast upp í Icesave skuldina. Þetta er 37 milljörðum meira en áður var áætlað. Þar með aukast tekjur tryggingarsjóðs innistæðueigenda um 19 milljarða kr.

Þetta þýðir að greiðslur íslenska ríkisins vegna Icesava samninginn minnka úr 47 milljörðum kr. og niður í 32 milljarða kr.

Samninganefnd Íslands í Icesave deilunni kynnti þetta nýja mat skilanefndar Landsbankans á heimtum eigna úr búi Landsbankans á blaðamannafundi sem nú stendur yfir. Hægt er að fylgjast með fundinum í beinni útsendingu hér á vísir.is.

Matið er uppfært á þriggja mánaða fresti af skilanefnd Landsbankans.

Fram kom hjá nefndinni að mat hennar á kostnaði ríkisins af Icesave byggir alfarið á þeim forsendum sem nefndin telur traustastar og réttastar. Forsendurnar hafa hinsvegar verið breytilegar í gegnum tíðina. Því var talið rétt að uppfæra matið.