Sjávarréttir á matseðli Neanderdalsmanna

Neanderdalsmaðurinn reynist hafa neytt fjölbreyttari fæðu en áður var talið og nú hefur komið í ljós að sjávarréttir voru ofarlega á matseðlinum.

Þessir veiðimenn ísaldarinnar sem voru forsmekkurinn að mannkyni nútímans reyndust hafa mun fjölbreyttari smekk en svo að þeir legðu sér eingöngu til munns kjötmeti af skepnum veiddum uppi á landi. Þetta var þó lífseig kenning þar sem langflestar mannvistarleifar tengdar Neanderdalsmanninum hafa fundist langt inni í landi, til dæmis í Neanderdalnum í Þýskalandi sem lagði þessum forfeðrum til nafnið.

Nú hefur mannfræðingurinn Christopher Stringer við Náttúrusögusafnið í London uppgötvað menjar í tveimur sjávarhellum við Gíbraltar sem þykja benda eindregið til þess að þar hafi Neanderdalsmenn haldið til og ekki skirrst við að renna fyrir fisk í soðið í bland við hefðbundið kjötmeti. Þetta sýna leifar ýmissa sjávardýra sem fundist hafa í hellunum og bera þess öll merki að hafa verið kvöldverður einhvers fyrir svona eins og 30.000 árum en sú tímasetning smellpassar við tímabil Neanderdalsmannsins.