Í mun meiri hættu

Fólk sem er 60 ára og eldra er þrisvar sinnum líklegra til að deyja við að reyna að klífa Everest-tind heldur en yngra fólk. Þetta kemur fram í nýrri rannsókn sem vísindamenn við Washington-háskóla unnu.

Rannsökuðu þeir 2211 fjallgöngumenn frá árinu 1953, þegar byrjað var að klífa fjallið, til ársins 2006. Alls hafa 85 manns yfir sextugu reynt að komast á tindinn. Fjórir þeirra hafa dáið og aðeins tólf hafa komist alla leið. Dánartíðnin er 4,7% í þessum aldurshópi, sem er töluvert hærri tíðni en hjá yngri fjallgöngumönnum. Segja vísindamennirnir niðurstöðu rannsóknarinnar afar mikilvæga því sífellt fleiri yfir sextugu reyni að klífa Everest.

Í maí síðastliðnum varð 71 árs gamall japanskur maður elsta manneskjan til að sigrast á tindinum. Sú yngsta er aftur á móti fimmtán ára sherpa-stúlka.