Orlando - Denver í beinni á miðnætti

Leikur Orlando Magic og Denver Nuggets verður sýndur í beinni útsendingu á NBA TV sjónvarpsstöðinni á Fjölvarpinu í kvöld. Hér er um að ræða mjög forvitnilegan leik fyrir margra hluta sakir, því Denver hefur ekki landað sigri í Orlando síðan í mars 1992.

Denver hefur unnið 3 útileiki í röð og lýkur ferðalagi sínu með leiknum í Orlando í kvöld klukkan tólf á miðnætti. Orlando hefur unnið fjóra af síðustu fimm leikjum sínum í deildinni og vann síðast sannfærandi sigur á Boston.

Gamla brýnið Grant Hill hefur farið á kostum í liði Orlando í upphafi leiktíðar og er stigahæsti maður liðsins með 16,4 stig að meðaltali, en annars dreifist stigaskorun mjög jafnt hjá liðinu. Dwight Howard hefur verið í fantaformi og var með 17 stig og 15 fráköst í síðasta leik.

Hjá Denver er Carmelo Anthony allt í öllu í sóknarleiknum og skorar að meðaltali 30 stig í leik. Denver verður án kraftframherjanna Kenyon Martin og Nene í kvöld, en sá fyrrnefndi spilar líklega ekki fyrr en eftir áramót vegna hnéuppskurðar.