Actavis selur bréfin í Pliva

Í tilkynningu frá Actavis segir að hagnaður félagsins af sölu bréfanna muni að hluta verða nýttur til að mæta þeim kostnaði sem félagið hefur borið af yfirtökuferlinu. Yfirtökuferlið, sem er það flóknasta sem Actavis hefur ráðist í, fól meðal annars í sér ítarlega áreiðanleikakönnun, kostnað vegna bankatryggingar og umsóknarferli til samkeppnisyfirvalda í 14 löndum.

Gjaldfærður kostnaður vegna verkefnisins nemur 25 milljónum evra, jafnvirði rúmlega 2,1 milljarða króna. Kostnaðurinn verður að fullu gjaldfærður á þriðja ársfjórðungi en ekki á þeim fjórða eins og áður hafði verið gefið til kynna og verður hann bókaður undir fjármagnsliðum, að því er segir í tilkynningunni. Gjaldfærslan mun því ekki hafa áhrif á fjárhagsleg markmið félagsins fyrir árið 2006, sem eru 20-21 prósents EBITDA framlegð og 10 prósenta innri vöxtur.

Þá er haft eftir Róbert Wessman, forstjóra Actavis, að ákvörðun um sölu bréfa í Pliva sé í samræmi við fjárfestingastefnu félagsins. „Við töldum ekki rétttlætanlegt að greiða hærra verð fyrir félagið en við höfðum áður boðið og teljum það ekki lengur þjóna hagsmunum félagsins að halda hlut okkar í félaginu. Við munum halda áfram að styðja góða undirliggjandi starfsemi félagsins, ásamt því að leita annarra fjárfestingatækifæra með það markmið að skipa Actavis í hóp stærstu samheitalyfjafyrirtækja á öllum okkar lykilmörkuðum," segir hann.