Lovísa til Orku­veitunnar

Þar segir að Lovísa búi yfir mikilli þekkingu og reynslu á sviði orkumála en hún starfaði í áratug sem upplýsingafulltrúi Samorku, samtaka orku- og veitufyrirtækja. 

„Þar bar hún meðal annars ábyrgð á innri og ytri samskiptum, fjölmiðlasamskiptum, miðlun efnis, viðburðahaldi og ímyndarmálum, auk þess sem hún var framleiðandi og þáttastjórnandi hlaðvarpsins Lífæðar landsins.“

Áður starfaði Lovísa um árabil hjá RÚV, meðal annars sem frétta- og dagskrárgerðarmaður. Á dögunum var greint frá því að Hafdís Helga Helgadóttir, umsjónarmaður Morgunútvarpsins á Ríkisútvarpinu, hefði tekið við stöðu Lovísu hjá Samorku.

Lovísa hefur einnig starfað við markaðs- og ráðgjafarstörf og setið í stjórnum félaga á sviði orku- og jarðhitamála. Hún er með meistaragráðu í blaða- og fréttamennsku frá Háskóla Íslands og B.A. gráðu í bókmenntafræði frá sama skóla.

„Orkuveitan er gríðarlega spennandi fyrirtæki með metnaðarfulla framtíðarsýn. Verkefnin og vegferð fyrirtækisins í orku-, nýsköpunar- og loftslagsmálum eru bæði krefjandi og mikilvægt samfélagslegt verkefni. Ég hlakka til að taka þátt í opnu og upplýstu samtali við samfélagið og stuðla að því að nýting auðlinda okkar skapi verðmæti, styðji við sjálfbæra þróun og betra samfélag,“ segir Lovísa.

Í tilkynningu sem Breki Logason, fyrrverandi fréttastjóri Stöðvar 2 og samskiptastjóri Orkuveitunnar síðustu ár, sendir til fjölmiðla segir að Rannsóknir og nýsköpun hjá Orkuveitunni vinni að bættri auðlindanýtingu, kolefnishlutleysi og aukinni orkuframleiðslu. 

„Mikil áhersla er lögð á virðisaukandi lausnir og öfluga nýsköpun. Meðal verkefna má nefna íslenska djúpborunarverkefni (IDDP) sem Orkuveitan hefur tekið þátt í frá upphafi, rannsóknir og undirbúning nýrra vindorku- og jarðhitakosta, og fjölmörg nýsköpunarverkefni sem hlotið hafa styrki frá t.d. Evrópusambandinu.“