Tólf í röð hjá New Jersey

Lið New Jersey Nets hefur heldur betur verið á sigurgöngu í NBA deildinni að undanförnu og í nótt skellti liðið Miami og vann sinn 12. leik í röð. Vince Carter fór á kostum í liði New Jersey og skoraði 43 stig, en Dwayne Wade skoraði 32 stig fyrir Miami.

Detroit lagði Phoenix 109-102 eftir að hafa lent mest 17 stigum undir í leiknum. Chauncey Billups skoraði 35 stig fyrir Detroit, en Shawn Marion 32 stig og hirti 10 fráköst fyrir Phoenix.

Dallas hristi af sér slenið eftir þrjú töp í röð og skellti Denver 103-79. Dirk Nowitzki skoraði 30 stig og hirti 12 fráköst fyrir Dallas, en Carmelo Anthony skoraði 25 stig fyrir Denver.

Kobe Bryant skoraði 43 stig fyrir LA Lakers í 104-88 sigri á Houston. Yao Ming skoraði 33 stig og 16 fráköst fyrir Houston.

Minnesota lagði Golden State í framlengingu 106-104. Jason Richardson skoraði 33 stig fyrir Golden State, en Marcus Banks skoraði 24 stig fyrir Minnesota.

Memphis stöðvaði þriggja leikja taphrinu með sigri á Atlanta 98-87. Chucky Atkins skoraði 19 stig fyrir Memphis, en Josh Smith skoraði 26 stig fyrir Atlanta.

Philadelphia vann New York í annað sinn um helgina 114-95. Allen Iverson skoraði 32 stig fyrir Philadelphia en Jamal Crawford skoraði 23 stig fyrir New York.

Cleveland vann áttunda leik sinn í röð þegar liði skellti Charlotte á útivelli 101-97. LeBron James átti enn einn tröllaleikinn með 35 stigum, 12 fráköstum og 8 stoðsendingum, en Raymond Felton var bestur hjá Charlotte með 20 stig.

Nýliðinn Chris Paul náði fyrstu þrennu sinni á ferlinum þegar New Orleans lagði Toronto 120-113 í tvíframlengdum leik. Paul skoraði 24 stig, hirti 12 fráköst og gaf 12 stoðsendingar. En Mo Peterson skoraði 27 stig fyrir Toronto.

Sacramento hélt uppteknum hætti gegn LA Clippers á heimavelli sínum og sigraði 106-96, en Clippers hefur ekki unnið í Sacramento í níu ár. Ron Artest skoraði 26 stig fyrir Sacramento, en þeir Sam Cassell og Chris Kaman skoruðu 20 stig hvor fyrir Clippers.

Loks burstaði Seattle heillum horfið lið Portland 122-83. Ray Allen skoraði 24 stig fyrir Seattle, en Martell Webster og Sebastian Telfair skoruðu 14 stig hvor fyrir Portland sem tapaði sínum 11. leik í röð.