LA Lakers - San Antonio í beinni

Það verður góður leikur á dagskrá á NBA TV fyrir hörðustu nátthrafna í kvöld þegar Los Angeles Lakers tekur á móti meisturum San Antonio, en leikurinn hefstu klukkan 3:30 að íslenskum tíma. Leikurinn verður svo sýndur aftur í fyrramálið venju samkvæmt.

Bæði lið unnu sigur í síðasta leik sínum á laugardagskvöldið, Lakers vann frækinn sigur á toppliði Detroit á heimavelli sínum þar sem Kobe Bryant skoraði 40 stig og San Antonio valtaði yfir Portland með 20 stiga mun. San Antonio hefur unnið 6 leiki í röð og 15 af síðustu 17.

Liðin hafa mæst einu sinni áður á tímabilinu og þá hafði San Antonio naumlega betur 90-84. Sá leikur fór fram 29. nóvember. San Antonio er í efsta sæti Vesturdeildarinnar með 46 sigra og aðeins 12 töp, en Lakers hefur unnið 31 leik og tapað 29.