Iverson skoraði 40 stig

Allen Iverson verður ekki boðið að taka þátt í æfingabúðum þar sem valið verður í landslið Bandaríkjanna fyrir HM og Ólympíuleikana í körfubolta og í gær svaraði hann því á sinn hátt þegar hann skoraði 40 stig og gaf 10 stoðsendingar í sigri Philadelphia á Houston, þrátt fyrir að vera með flensu.

Iverson viðurkenndi að hann væri hissa á að vera ekki inni í myndinni hjá landsliðsnefndinni, en sagðist vona að þeim snerist hugur. Hann var allt í öllu í sigri Philadelphia á Houston í gær og skoraði stigin sem gerðu út um leikinn undir lokin. Tracy McGrady skoraði 25 stig fyrir Houston.

Sacramento lagði Cleveland 97-90 þar sem Kenny Thomas skoraði 22 stig og hirti 10 fráköst fyrir Sacramento, en LeBron James skoraði 19 stig og gaf 12 stoðsendingar fyir Cleveland. Hann hitti þó illa í leiknum, enda var hann í strangri gæslu hjá Ron Artest. Þetta var fimmta tap Cleveland í röð.

Indiana lagði Washington á útivelli 99-93. Stephen Jackson skoraði 26 stig fyrir Indiana en Gilbert Arenas skoraði 28 stig fyrir Washington sem hefði unnið 9 leiki í röð á heimavelli fyrir leikinn.

Atlanta lagði Toronto í framlengingu 113-111. Al Harrington og Joe Johnson skoruðu 26 stig hvor fyrir Atlanta, en Chris Bosh skoraði 27 stig fyrir Toronto.

Miami vann Boston 103-96. Dwayne Wade skoraði 24 stig fyrir Miami, en Paul Pierce skoraði 38 stig fyrir Boston.

Minnesota lagði New Jersey 100-90. Kevin Garnett skoraði 26 stig og hirti 16 fráköst hjá Minnesota, en Vince Carter skoraði 29 stig fyrir New Jersey.

Memphis vann nauman sigur á New York 101-99. Pau Gasol skoraði 23 stig fyrir Memphis, en Stephon Marbury skoraði 25 stig og gaf 13 stoðsendingar fyrir New York.

Detroit tapaði nokkuð óvænt fyrir Denver á útivelli 98-87. Chauncey Billups skoraði 27 stig fyrir Detroit en Kenyon Martin skoraði 28 fyrir Denver og Marcus Camby skoraði 13 stig, hirti 20 fráköst og varði 5 skot.

Phoenix vann 8. leik sinn í röð þegar liðið skellti Milwaukee á heimavelli sínum 123-110. Shawn Marion skoraði 29 stig og hirti 18 fráköst fyrir Phoenix, en Michael Redd skoraði 37 stig fyrir Milwaukee.

Charlotte burstaði Utah á útivelli 104-89, en þetta var aðeins sjötti útisigur liðsins í vetur. Utah lék án Andrei Kirilenko sem er meiddur í baki og hefur nú unnið tvo og tapað níu leikjum án hans í vetur. Brevin Knight skoraði 19 stig og gaf 10 stoðsendingar hjá Charlotte, en Matt Harpring skoraði 22 stig fyrir Utah.

Portland vann nokkuð óvæntan sigur á LA Lakers 99-93. Kobe Bryant skoraði 35 stig fyrir Lakers, en Zach Randolph skoraði 20 stig fyrir Portland.

Golden State lagði Orlando 98-94, þar sem Jason Richardson skoraði 11 af 25 stigum sínum á síðustu tæpum tveimur mínútum leiksins og tryggði sínum mönnum sigur. DeShawn Stevenson skoraði 18 stig fyrir Orlando og Darko Milicic skoraði 12 stig og hirti 9 fráköst.

Loks vann LA Clippers sigur á New Orleans 89-67, þar sem New Orleans skoraði aðeins 16 stig í síðari hálfleiknum sem er lægsta stigaskor í einum hálfleik í vetur. Desmond Mason skoraði 20 stig fyrir New Orleans, en Elton Brand skoraði 25 stig fyrir Clippers.