Annir hjá jólasveinum

Jólasveinar hafa nóg að gera á þessum árstíma, ekki bara hér á landi heldur um allan heim. 

Í Japan mættu til dæmis tveir sveinar í dýragarðinn í Tókýó í gær, ekki til að dreifa gjöfum eða syngja jólalög heldur til þess að gefa ísbirni þar fisk að éta. Hann virtist vera mjög sáttur við heimsókn jólasveinanna.  

Í Bandaríkjunum er jólasveinninn hins vegar upptekinn af skrifræðinu. Þar í landi flýgur sveinki nefnilega á sleða og til þess að það væri leyft þurfti hann í gær að verða sér úti um flugleyfi. Samgöngumálaráðherra Bandaríkjanna gekk í málið og eftirlitsmenn flugmálastofnunar skoðuðu sleðann vandlega. Hreindýrið Rúdolf slapp þó við skoðun.  

Í Mexíkó er ekki víst að jólasveinar þori upp á svið, miðað við hversu ófrýnilegir leikararnir sem settu fæðingu Krists á svið eru. Mexíkóskir fjölbragðaglímukappar tóku sig til og sýndu sína túlkun á atburðum aðfangadagskvölds fyrir 2004 árum síðan, með nokkuð óvenjulegum hætti. 

Hægt er að sjá myndir af ævintýrum jólasveinanna með því að smella á hlekkinn hér að neðan.