Giggs fer ekki fram á mikið

Umboðsmaður Ryans Giggs, segir að umbjóðandi hans fari ekki fram á mikið í samingaviðræðum sínum við Manchester United og furðar sig á því að félagið skuli ekki vera búið að endurnýja samninginn við kappann sem rennur út 2006. Alex Ferguson, knattspyrnustjóri Manchester United, bauð Giggs eins árs framlengingu en kappinn var ekki ánægður með það. Giggs vill fá tveggja ára samning og telur sig eiga hann skilinn eftir frábæra þjónustu við félagið en Ferguson er ekki á því að gefa sig enda er stefna félagsins að leikmenn sem komnir eru yfir þrítugt fái aðeins eins árs samning í einu.