Setja upp fjöru­tíu smá­hýsi í Þjórs­ár­dal

Í maí voru undirritaðir sérleyfis- og lóðaleigusamningar á milli íslenska ríkisins og Bláa lónsins hf. um uppbyggingu og rekstur þjónustumiðstöðvar og annarrar atvinnustarfsemi í ferðaþjónustu í Þjórsárdal. Auk starfseminnar í gestastofunni vinnur Bláa lónið að uppbyggingu hótels í Rauðukömbum, hótelsins Mountain Retreat sem verður að hluta grafið inni í fjallshlíð, og Fjallabaðanna.

Samkvæmt tilkynningunni eru smáhýsin framleidd í verksmiðju Byko í Lettlandi og koma fullbúin til landsins, það er með innréttingum, hreinlætisaðstöðu og öllum frágangi, og því tilbúin til uppsetningar. Þar kemur einnig fram að fjölbreytt úrval húsa verði í boði sem henti ólíkum þörfum, hvort sem um er að ræða pör, fjölskyldur eða þá sem kjósa einfaldari gistingu í húsum með kojum.

Marki upphaf starfseminnar í Þjórsárdal

„Við erum afar stolt og þakklát fyrir það traust sem okkur er sýnt með þátttöku okkar í þessari metnaðarfullu uppbyggingu í Þjórsárdal. Það er ánægjulegt að fá að leggja okkar af mörkum til svo spennandi verkefnis,“ segir Sigurður Brynjar Pálsson, forstjóri Byko, í tilkynningunni.

„Við höfum frá upphafi lagt áherslu á metnað og fagmennsku í Þjórsárdal og þess vegna lá beinast við að vinna með Byko. Húsin rísa í fallegu skóglendi við Sandá og styrkja vel fjölbreytt framboð gistingar í Þjórsárdal. Húsin munu marka upphaf starfsemi okkar í Þjórsárdal þegar þau opna sumarið 2027 þegar Fjallaböðin sjálf verða tilbúin 2028,“ segir Sigríður Margrét Oddsdóttir forstjóri Bláa lónsins, í tilkynningunni.

Í tilkynningu um smáhýsin segir að uppbygging Bláa lónsins í Þjórsárdal byggi á langtímasýn um aukið aðgengi að náttúru og sögu dalsins, með það að markmiði að gera hann að heildstæðum áfangastað, með virðingu fyrir sérstöðu svæðisins.

Í tilkynningu segir að uppbyggingin muni skapa fjölbreytta möguleika til afþreyingar í Þjórsárdal og styrkja stöðu svæðisins sem áfangastaðar fyrir innlenda jafnt sem erlenda ferðamenn, allt frá gistingu í hágæða smáhýsum til fjallabaða, gönguferða og fræðslu um sögu og náttúru dalsins. Þar sé hægt að skoða Stöng, Háafoss, Hjálparfoss og Gjánna.

„Verkefnið er jafnframt í takt við áherslur á að dreifa ferðamönnum víðar um landið og lengja ferðamannatímabilið, og fellur vel að metnaði Skeiða- og Gnúpverjahrepps og stjórnvalda um öfluga uppbyggingu ferðaþjónustu á svæðinu,“ segir í tilkynningunni.

Þar kemur einnig fram að Byko og Bláa lónið hafi um árabil verið öflugir samstarfsaðilar. Fyrirtækin hafi átt í samstarfi við Blue Lagoon Retreat hótelið í Svartsengi, sem og í Kerlingarfjöllum og við breytingar á Fontana við Laugarvatn.