Sam­komu­lag Tækniskólans og Hafnar­fjarðar út um þúfur

Þetta kemur fram í sameiginlegri yfirlýsingu Tækniskólans og Hafnarfjarðarbæjar.

„Tækniskólinn og Hafnarfjarðarbær hafa undanfarin ár unnið að framtíðaruppbyggingu skólans við Flensborgarhöfn í Hafnarfirði í samræmi við samkomulag við ríkið. Hafnarfjarðarbæ hefur ekki tekist að afhenda Tækniskólanum lóðina sem fyrirhuguð er undir skólann í tæka tíð og óvíst er hvenær af því getur orðið. Af þeim sökum hefur undirbúningur og hönnun nýbyggingarinnar þegar tafist um marga mánuði,“ segir í tilkynningunni.

Þau hafi sammælst um að ekki væri svigrúm til frekari tafa á verkefninu og muni forsvarsmenn Tækniskólans því kanna aðra möguleika á framtíðarstaðsetningu skólans á höfuðborgarsvæðinu.

„Hafnarfjarðarbær og Tækniskólinn leggja áfram áherslu á gott samstarf og að næstu skref verði tekin með faglegum og farsælum hætti. Nánari upplýsingar verða veittar eftir því sem þeirri vinnu miðar áfram.“

Árið 2021 var talið að framtíðarlausn á húsnæðisvanda Tækniskólans væri fundin þegar fulltrúar ríkisstjórnarinnar, bæjaryfirvalda í Hafnarfirði og Tækniskólans undirrituðu viljayfirlýsingu um að byggja nýtt húsnæði við Suðurhöfn í Hafnarfirði.

Þar samþykkti Hafnarfjarðarbær að leggja fram stofnfjárframlag frá bænum í formi lóðar án kvaða og gjalda ásamt beinu fjárframlagi. 

Fréttin hefur verið uppfærð.