Fjöldi mennta­skóla­nema sá mynd­skeið af á­rásinni

Aðalmeðferð í máli Héraðssaksóknara á hendur þeim Kareem Abufarhah, Qossay Alsadi og Mohamed Ahmed hófst í Héraðsdómi Reykjavíkur í gær og heldur áfram á morgun. Þeim er gefið að sök að hafa reynt að myrða mann með því að aka á hann á mikilli ferð, berja með kylfu og stinga í vinstri rasskinn, í bílakjallara undir Höfðatorgi í Reykjavík í mars síðastliðnum.

Menntaskólanemar viðstaddir

Aðalmeðferðin hófst á því að Abufarhah gaf skýrslu fyrir dómi. Það sem hæst bar þar var þegar sækjandi spilaði myndskeið, sem sýndi hvernig hvítum Land Rover Defender var ekið á mikilli ferð á brotaþola, sem skaust upp í loft og marga metra áfram. Dómsalur 101 var þéttsetinn og ekki var laust við að nokkur andköf heyrðust þegar bíllinn hæfði brotaþola. Meðal gesta í sal var talsverður fjöldi nemenda í lögfræðiáfanga í Verslunarskóla Íslands. 

Abufarhah neitar sök í málinu og sagði að hann hefði ekki verið undir stýri þegar bílnum var ekið á brotaþola, en gekkst við því að hafa ekið bílnum í og úr bílakjallaranum.

Einn fór bílavillt og annar var mættur til að reykja kannabis

Næst var komið að Alsadi, sem er sakaður um að hafa barið brotaþola ítrekað með kylfu. Hann gaf skýrslu í gegnum fjarfundarbúnað frá Jórdaníu og kvaðst hafa mætt í bílakjallarann fyrir rælni og ekki tekið þátt í átökum þar. Spurður að því hvernig stæði á því að hann hefði endað í hvíta Land Rovernum sagðist hann einfaldlega hafa farið bílavillt.

Ahmed mætti síðastur sakborninga fyrir dóminn og bar um að hann hefði verið kominn í bílakjallarann til þess að reykja kannabis með vini sínum, eitthvað sem hann hefði gert daglega í um tvo mánuði. Skyndilega hefðu þrír menn mætt vopnaðir og mikil átök brotist út. Hann hefði reynt að stöðva átökin en ekki tekið þátt í þeim. 

Sækjandi spurði hann hvort gráklæddur maður á myndskeiði væri hann, sem hann sagði vera líklegt. Á myndskeiðinu sést gráklæddur maður virðast stinga brotaþola einu sinni en Ahmed sagði þá loks að hann hefði séð annan mann stinga brotaþola. Hann hefði ekki sagt frá því fyrr vegna ótta um líf sitt.

Brotaþoli gekkst við því að sjá illa

Loks kom brotaþoli fyrir dóm sem vitni. Hann sagðist hafa mætt í bílakjallarann til þess að ræða við Abufarhah um meintan þjófnað Abufarhah af kunningja hans. Hann hefði haft tvo félaga sína með í för fyrir tilviljun og hann hefði ekki séð að þeir væru vopnaðir. Á myndskeiði sem var borið undir brotaþola sést annar félagi hans greinilega með hafnaboltakylfu og hinn virðist halda á einhvers konar vopni. 

Einn verjanda spurði brotaþola þá hvort hann sæi illa, enda sæist á myndskeiðinu hvernig félagi hans hélt á kylfunni beint fyrir framan hann. Brotaþoli gekkst við því að sjá frekar illa.

Þá sagðist hann ekkert hafa þekkt til hinna ákærðu þrátt fyrir að borin hefðu verið undir samskipti ákærðu við annan meðreiðarsveina hans, sem virtust snúast um einhvers konar fíkniefnaviðskipti. Brotaþoli tók alfarið fyrir að hafa staðið í slíkum viðskiptum, líkt og allir þrír ákærðu.