Annar vinningur hættir að safnast upp í Vikinglottó

Dómsmálaráðuneytið hefur birt breytingarnar í Samráðsgátt að beiðni Íslenskrar getspár.

Til að vinna fyrsta vinning þarf allar sex aðaltölurnar og rétta Víkingatölu. Sá sem fær aðaltölurnar sex en ekki Víkingatöluna fær annan vinning.

Nú flyst annar vinningur yfir á næstu viku ef enginn vinnur. Eftir breytinguna fer féð í jöfnunarsjóð Vikinglottó, sem er varasjóður leiksins og tryggir að fyrsti vinningur verði aldrei lægri en þrjár milljónir evra, um 422 milljónir króna.

Hámark fyrsta vinnings er 25 milljónir evra, um 3,5 milljarðar króna. Fé umfram þá upphæð fer nú í annan vinning í næsta útdrætti en á framvegis að renna í jöfnunarsjóðinn.

Viðmiðið fyrir stærð sjóðsins verður jafnframt lækkað úr 7,5 milljónum evra í sex milljónir. Fari sjóðurinn yfir sex milljónir bætist umframféð við fyrsta vinning. Sé fyrsti vinningur þegar yfir 25 milljónum evra helst féð þó í sjóðnum þar til einhver vinnur pottinn. Það bætist þá við fyrsta vinning í næsta útdrætti.

Breytingarnar beina þannig meira fé í fyrsta vinning en draga úr möguleikanum á mjög stórum öðrum vinningum.

Í drögunum minnka einnig uppgefnar líkur á öðrum vinningi úr einum á móti 12,3 milljónum í einn á móti 15,3 milljónum. Líkur á fimm réttum án Vikingatölunnar breytast úr einum á móti 48,696 í einn á móti 60,871.

Engin breyting er þó gerð á útdrættinum sjálfum. Áfram verða dregnar sex aðaltölur úr 48 tölum og ein víkingatala úr fimm. 

Reglurnar eiga að taka gildi 1. október.