„Það þýðir ekki að pissa í skóinn sinn“

Tímabundin lækkun á virðisaukaskatti á bensín úr 24 prósentum í ellefu prósent rennur út á miðnætti og þar með hækkar bensínverðið á ný. 

„Neytendasamtökin, verðlagseftirlit ASÍ, FÍB og Samkeppniseftirlitið fylgjast með því að þetta muni skila sér að fullu til neytenda, að hækkanirnar verði ekki umfram það sem efni standa til,“ sagði Breki Karlsson, formaður Neytendasamtakanna, í kvöldfréttum Sýnar.

Hann telur að árvökulir neytendur muni hafa samband verði eitthvað bogið við bensínverðið. Það sé hringlandaháttur af hendi stjórnvalda að lækka virðisaukaskattinn einungis tímabundið. 

„Þarna er verið að reyna að handstýra verðbólgunni á einhvern hátt en það kemur bara út þannig að verðskyn neytenda verður að engu. Það verður okkur mjög erfitt að fylgjast með hvað verðið í raun og veru á að vera,“ segir Breki.

„Þetta skilaði sér í 0,68 prósenta lækkun á verðbólgu. Það er vel, en það verða að vera varanlegar aðgerðir til þess að lækka verðbólguna. Það þýðir ekki að pissa í skóinn sinn með þessum hætti eins og nú er gert.“

Nú þurfi allir að standa saman.

„Það er há viðvarandi verðbólga. Nú verða allir að leggjast á árarnar og ná henni niður, ekki bara tímabundið heldur varanlega.“