„Gripur sem safnarar bíða alla ævi eftir“

Um treyju sem Michael Jordan klæddist í þriðja leik úrslitaeinvígis Chicago Bulls og Utah Jazz tímabilið 1998 er að ræða. Hún er verðmetin á 10 til 15 milljónir Bandaríkjadala. Því sem jafngildir 1.2 til 1.8 milljarði íslenskra króna. 

„Þetta er gripur sem safnarar bíða heila ævi eftir. Ómetanlegur gripur sem teygir anga sína langt út fyrir körfubolta. Er hluti af alþjóðlegri menningarsögu,“ segir Caitlin Donovan, starfsmaður Joopiter uppboðshaldarans. 

Tímabilið hefur verið kallað „hinnsti dans“ þáverandi leikmannahóps Chicago Bulls og var farið náið ofan í saumana á því í heimildarþáttaröð Netflix frá árinu 2020. 

Þetta var lokatímabil Michael Jordan með Chicago Bulls og varð liðið meistari þriðja tímabilið í röð. 

Á þessu tímabili vann Michael Jordan sinn síðasta NBA meistaratitil á ferlinum en alls urðu þeir sex talsins. 

Í umræddum þriðja leik Chicago Bulls gegn Utah Jazz í úrslitaeinvíginu 1998 skoraði Michael Jordan 24 stig. 

Engin fordæmi eru fyrir því að hvíta treyja Chicago Bulls frá þessum tíma, sem Michael Jordan klæddist í einhverjum af leikjum úrslitaeinvígisins 1998, hafi ratað á uppboð. Því er um afar fágæta eign á uppboði að ræða.  

Fari hún á uppsettu verði verður hún hins vegar langt frá því verðmætasta treyja sögunnar. 

Verðmætasta treyja sögunnar er treyja sem hafnaboltakappinn Babe Ruth klæddist í leik 3 í úrslitaeinvígi árið 1932. Hún seldist fyrir rúmar 24 milljónir Bandaríkjadala á uppboði, tæpa þrjá milljarða íslenskra króna.