Þor­lákur tekinn til starfa í Sádi-Arabíu

Þorlákur var á föstudaginn kynntur sem nýr þjálfari kvennaliðs Al Ahli en liðið hefur endað í næstefsta sæti sádiarabísku úrvalsdeildarinnar síðustu þrjár leiktíðir í röð. Hann tekur við liðinu af hinni jórdönsku Manar Freij.

Þorlákur verður þar með eini Íslendingurinn í deildinni en Sara Björk Gunnarsdóttir lék þar með Al Qadsiah í tvö ár áður en hún fluttist heim í Hauka í sumar.

Samningur Þorláks við Al Ahli er til eins árs en á heimasíðu félagsins er tekið fram að hann sé með glæsilega ferilskrá og hæstu þjálfaragráðu UEFA.

Þorlákur var síðast þjálfari karlaliðs ÍBV og náði þar frábærum árangri en hætti óvænt undir lok síðasta árs, ósáttur við að félagið skyldi ráða fyrirliða Eyjaliðsins, Alex Frey Hilmarsson, sem framkvæmdastjóra knattspyrnudeildar.

Áður var Þorlákur þjálfari kvennaliðs Damaiense í Portúgal og þá hefur hann til að mynda gert kvennalið Stjörnunnar að Íslandsmeistara árin 2011 og 2013 auk þess að starfa sem yfirmaður knattspyrnumála hjá knattspyrnusambandi Hong Kong eftir að hafa verið yfirmaður hæfileikamótunar hjá KSÍ.

Fyrsti leikur Al Ahli undir stjórn Þorláks verður í sádiarabíska ofurbikarnum gegn meisturum Al Nassr 1. september. Ný leiktíð í sádiarabísku úrvalsdeildinni hefst svo með leik við Al Taraji 11. september.