Good Morning America í beinni frá Bláa lóninu á al­myrkva

Hátt í 80 þúsund ferðamenn verða á landinu á meðan á almyrkvanum stendur. Almyrkvinn sé lengstur á landi við Látrabjarg, þar sem hann vari 2,13 mínútur. Hann vari í um 2,09 mínútur vestast á Snæfellsnesi og svo um 1,40 vestast á Reykjanesskaga. Á höfuðborgarsvæðinu mun sjást best til almyrkvans á Seltjarnarnesi og verður því lokað fyrir fjölda gatna í bæjarfélaginu.

Töluvert af öryggisráðstöfunum verða gerðar á Vestfjörðum vegna almyrkvans þann 12. ágúst næstkomandi. Til að mynda verður veginum um Bolafjall lokað og fari of margir í átt að Látrabjargi verður veginum lokað.

Nokkrir mánuðir eru síðan að allt gistipláss á Vestfjörðum seldist upp og er búist við að mikill fjöldi leggi leið sína til Vestfjarða til að sjá almyrkvann. 

NASA og tónleikar

Greint hefur verið frá því í aðdraganda að NASA, bandaríska geimferðastofnunin, ætli að fylgjast með myrkvanum á Íslandi. 

Á Hellissandi er búið að skipuleggja stóra hátíð, Iceland Eclipse, sem stendur frá 11. til 15. ágúst og á Víðistaðatúni stendur Björk Guðmundsdóttir fyrir tónlistarviðburði.

Á vef Stjórnarráðsins segir að það séu sem fyrr tilmæli stjórnvalda að fólk á vestanverðu landinu og suðvesturhorninu reyni að njóta þessa einstæða og sögulega atburðar heima eða í sínu nærumhverfi.

Samkvæmt upplýsingum frá almannavarnadeild ríkislögreglustjóra má búast við töluverðum umferðarþunga í þrjá daga fyrir atburðinn og tvo daga á eftir. Landhelgisgæslan gerir ráð fyrir að vera með tvær þyrlur og tvær áhafnir til taks í Reykjavík og að þriðja áhöfnin verði tiltæk til að leysa af ef þörf krefur. Þyrlurnar verða í Reykjavík en varðskipið Freyja staðsett úti fyrir Vesturlandi auk þess sem nýir aðgerðarbátar Gæslunnar verða á Snæfellsnesi annars vegar og Suðurnesjum hins vegar til að sinna löggæslu á hafi ef á þarf að halda.

Hægt er að nálgast nýjustu upplýsingar um almyrkvann á island.is/almyrkvi.