Níu hand­teknir vegna vopnalagabrots á Akur­eyri

Þetta segir í tilkynningu frá lögreglunni á Norðurlandi eystra. Vopnalagabrotið er til rannsóknar og er fréttastofan að óska eftir frekari upplýsingum. 

Mikill erill er sagður hafa verið hjá embættinu síðastliðinn sólarhring en fjöldi fólks er á Akureyri þar sem bæjarhátíðin Ein með öllu fer fram um verslunarmannahelgina. 

Líkamsárás á Akureyri en engin mál á Siglufirði

Ein líkamsárás var tilkynnt til lögregluembættisins. Þá komu upp átta mál vegna ölvunar eða vímuástands og gistu tveir í fangageymslu.

Í fimm tilvikum voru afskipti höfð af börnum vegna ástands. Tíu umferðarlagabrot eru skráð hjá embættinu síðastliðinn sólarhring en ekkert tilfelli kom upp þar sem grunur var um akstur undir áhrifum vímugjafa.

Engin mál eru skráð hjá lögreglunni á Siglufirði þar sem bæjarhátíðin Síldarævintýrið á Siglufirði fer fram. Alls voru skráð 83 mál hjá lögreglunni á Norðurlandi eystra síðastliðinn sólarhring.

Fréttin er í vinnslu.