Vesturbæjarlaug opnar dyrnar á ný

Sundlaugin hafði verið lokuð vegna viðhalds frá 23. júní síðastliðnum. Loka þurfti lauginni í tæpa tvo mánuði síðasta sumar meðan viðhald fór fram á henni. Hefur flögnun málningar á laugarbotninum síðan þá valdið vandræðum. Lauginni var lokað aftur 18. ágúst en hún opnuð viku síðar. Henni var lokað aftur í sólarhring síðar þann mánuð og í október var enn og aftur komið að því að loka í rúmar tvær vikur.

Þegar liggur fyrir að loka þarf lauginni í einhvern tíma næsta sumar til að sinna endurbótum á laugarkarinu.

Opnun hafði verið frestað um nokkra daga til að tryggja að málning á sundlaugarbotni barnalaugarinnar hefði náð fullnægjandi þurrki áður en vatni var hleypt á hana. Barnalaugin var við eðlilegt hitastig við opnun.

Kaldi potturinn opnar þó snemma, en búist hafði verið við að viðgerðir tækju nokkra daga til viðbótar.

Í tilkynningu frá Reykjavíkurborg er tekið fram að starfsfólk laugarinnar þakki gestum fyrir sýndan skilning og þolinmæði meðan á framkvæmdunum stóð og hlakki til að taka á móti þeim á ný.

Laugin nýtur stöðugra vinsælda meðal borgarbúa og hefur verið óhrædd við að leita á nýjar slóðir, nú síðast í vor með opnun nýrra sánubaða.