Sigur­jón nýr fram­kvæmda­stjóri Mediacom

Í tilkynningu segir að fyrirtækið hafi um árabil verið í samstarfi við stærsta birtingafyrirtæki heims, EssenceMediacom, sem nú sé hluti af WPP Media og starfi í yfir 80 löndum.

„Sigurjón tekur við starfinu af Þórmundi Bergssyni, sem verið framkvæmdastjóri félagsins frá stofnun. Þórmundur, sem er í dag 67 ára, hefur starfað lengur en flestir aðrir á sviði auglýsingabirtinga á Íslandi eða í tæp 40 ár. Hann og Mediacom hafa getið sér gott orð en fyrirtækið þjónar fjölda innlendra og erlendra viðskiptavina. 

Þórmundur færist nú í starf ráðgjafa hjá fyrirtækinu,“ segir í tilkynningunni. 

Haft er eftir Þórmundi að það sé ánægjuefni að geta afhent ævistarfið í hendur yngra fólks sem hafi sömu ástríðu og hann sjálfur. „Sigurjón hefur nú þegar komið inn með fjölda nýrra hugmynda um hvernig við getum þjónað viðskiptavinum Mediacom enn betur en áður og ég hlakka til að vinna með honum áfram.“

Sigurjón Rúnar Vikarsson, nýr framkvæmdastjóri Mediacom á Íslandi, er 34 ára og starfaði áður sem rekstrarstjóri Hopp. Þar áður starfaði hann meðal annars við viðskiptaþróun, hugbúnaðarþróun og markaðsmál hjá Nova. Sigurjón er með MBA-gráðu frá Háskóla Íslands og B.Sc.-gráðu í tölvunarfræði frá Háskólanum í Reykjavík. Þá hefur hann sótt stjórnendanámskeið hjá IESE.