Rýmdu skrif­stofur Hag­kaupa vegna hótunar

Sigurður Reynaldsson framkvæmdastjóri Hagkaupa staðfestir þetta í samtali við fréttastofu. Hann gat ekki sagt til um það hvers eðlis hótunin var. Það hafi hins vegar verið metið sem svo að skynsamlegast væri að senda alla starfsmenn heim í öryggisskyni.

Málið segir hann til rannsóknar hjá lögreglu og að Hagkaup fari eftir þeirra fyrirmælum. 

Fréttastofa náði sambandi við skrifstofuna í Skútuvogi þar sem einn starfsmaður er eftir til að sinna allra nauðsynlegustu verkefnum.

Fulltrúar Lögreglunnar á höfuðborgarsvæðinu sem Vísir hefur rætt við segjast ekki búa yfir upplýsingum um málið að svo stöddu.

Helena Rós Sturludóttir, upplýsingafulltrúi Ríkislögreglustjóra, segir í samtali við Vísi að sérsveitin hafi aðstoðað Lögregluna á höfuðborgarsvæðinu vegna málsins en að öðru leyti verði Lögreglan á höfuðborgarsvæðinu að veita upplýsingar um málið.

Sérsveitin er ávallt kölluð til þegar grunur er um vopnaburð en í ábendingu sem barst fréttastofu var talað um að hótunin fæli í sér notkun skotvopns.

Fréttin hefur verið uppfærð.