Vil­hjálmur sagði af sér þing­mennsku

Nýr meirihluti Sjálfstæðisflokksins og Miðflokksins tók við í Reykjanesbæ eftir nýafstaðnar sveitarstjórnarkosningar en Vilhjálmur var oddviti Sjálfstæðismanna.

Miklar mannabreytingar hafa verið á þingflokki Sjálfstæðisflokksins síðustu misseri en innan við vika er síðan Áslaug Arna Sigurbjörnsdóttir, fyrrverandi ráðherra og ritari flokksins, tilkynnti að hún myndi láta af þingmennsku. Vilhjálmur tók við af Áslaugu sem ritari Sjálfstæðisflokksins. 

Þá kvaddi Þórdís Kolbrún Reykfjörð Gylfadóttir, fyrrverandi ráðherra og varaformaður Sjálfstæðisflokksins, þingið í apríl en hún hefur verið skipuð sendiherra. Bjarni Benediktsson, fyrrverandi forsætisráðherra og formaður flokksins, hætti á þingi í byrjun árs. 

Vilhjálmur greinir frá afsögninni í færslu á Facebook-síðu sinni og þakkar þar fjölskyldu sinni og kjósendum í Suðurkjördæmi. Þar kemur fram að hann hafi síðast farið í ræðustól síðasta fimmtudag og fjallað þar um samgöngumál, „enda hef ég varið stórum hluta þingferils míns í störf umhverfis- og samgöngunefndar,“ segir hann í færslunni.

Fjallað hefur verið um þá ákvörðun Vilhjálms að segja ekki strax af sér þingmennsku og starfa samtímis sem bæjarstjóri og þingmaður í fjóra daga.

Þingmenn sem hafa setið á þingi í minnst tvö kjörtímabil eiga rétt á biðlaunum frá Alþingi í sex mánuði en samkvæmt reglum þingsins koma launagreiðslur nýs atvinnuveitenda til lækkunar þeirra ef fyrrverandi þingmaður fær annað starf innan hálfs árs. Í ljósi þess að mánaðartekjur Vilhjálms fyrir setu í bæjarstjórastóli nema um 2,8 milljónum króna og eru hærri en þingfararkaup falla biðlaunin niður samkvæmt þessum sömu reglum. 

Fréttin er í vinnslu.