Eftir sumarið tekur við ó­vissa

Þær fréttir bárust í gær að Bláa lónið, eitt stærsta ferðaþjónustufyrirtæki landsins, hefði fækkað stöðugildum um 29 á skrifstofu félagsins. Í tilkynningu kom fram að 115 starfi þar eftir breytingarnar sem þýðir að fimmta hverjum starfsmanni á skrifstofu félagsins var sagt upp í gær.

Fyrst sólmyrkvi, svo óveðursský

Óvissa í alþjóðamálum, hækkandi verðlag innanlands og stórkostleg hækkun á þotueldsneyti eru allt þættir sem benda til fækkunar ferðamanna í haust.

„Þegar kemur inn í haustið er mjög erfitt að sjá hvernig þetta verður,“ segir Jóhannes.

Hann segist ekki hafa orðið var við miklar uppsagnir innan greinarinnar en fyrirtæki leiti leiða til að spara og haldi að sér höndum við ráðningar.

„Það er verið að bíða og sjá, það er það sem við heyrum frá fyrirtækjum almennt.“

Aukin gjaldtaka á baðlón fellur í grýttan jarðveg

Jóhannes gagnrýnir fyrirætlanir stjórnvalda um aukna gjaldtöku á ferðaþjónustu.

„Eitthvað sem hjálpar ekki í þessu eru hugmyndir um virðisaukaskattshækkanir á baðlón sem komu fram í fjármálaáætlun.“

Baðlón séu þegar farin að huga að því hvaða áhrif þetta kæmi til með að hafa á reksturinn. Samtök ferðaþjónustunnar eigi þó í virkum samræðum við stjórnvöld.

„Við höfum farið ítarlega yfir með þeim hvaða áhrif þessar virðisaukaskattshækkanir hafa á ferðaþjónustu og á atvinnulífið í heild sinni,“ segir Jóhannes.

„Það liggur alveg fyrir að þetta hefur neikvæð áhrif á efnahagslífið í heild sinni.“

Greinin þrífist á fyrirsjáanleika

Fari virðisaukaskattshækkunin í gegn yrði hún líklega samþykkt í gegnum fjárlög. Fjárlög eru að jafnaði samþykkt í desember en taka gildi strax 1. janúar.

„Þetta er náttúrulega allt of stuttur fyrirvari fyrir grein sem vinnur 12–18 mánuði fram í tímann,“ segir Jóhannes með áherslu. Þetta leiði til þess að ferðaþjónustufyrirtæki þurfi sjálf að taka á sig kostnaðarhækkanir sem skili sér svo síðar út í verðlag.

Áhrifin gætu orðið ýktari fjær höfuðborgarsvæðinu

Þá segir Jóhannes mikilvægt að hafa í huga að flest baðlón séu staðsett utan suðvesturhornsins. Fyrir einhver þeirra geti auknar álögur þýtt að þau þurfi að hafa lokað hluta úr ári.

Í umsögn Vakar, baðslóns staðsett við Egilsstaði, við fjármálaáætlun kemur meðal annars fram að þessar fyrirætlanir ríkisstjórnarinnar setji heilsársstarfsemi í hættu. Fari það svo að Vök þurfi að loka hluta úr ári muni það hafa margvísleg áhrif á Austurland, til að mynda á atvinnustarfsemi og hve eftirsóknarvert sé að heimsækja svæðið.

Þrátt fyrir bjartsýni fyrir sumarið grúfir óvissan yfir haustinu. Þróun næstu mánaða á alþjóðasviðinu, auk ákvarðana stjórnvalda, munu skipta sköpum fyrir þróun greinarinnar.