Hættu leik þegar flug­eldum var skotið inn á völlinn

Öðrum leik úrslitaeinvígisins í serbnesku úrvalsdeildinni var snarhætt um miðjan fyrri hálfleik í gærkvöldi. Staðan var þá 6-5 fyrir RK Vojvodina gegn Partizan Belgrade en áhorfendur skutu flugeldum í átt að leikmönnum.

Ríkjandi meistarar Partizan Belgrade höfðu unnið fyrsta leikinn 33-27. 

Af því leikurinn var á heimavelli RK Vojvodina í gær, og áhorfendur heimaliðsins báru ábyrgð á flugeldunum, var Partizan Belgrade dæmdur 10-0 sigur.

Líklegt þykir að RK Vojvodina muni áfrýja þeirri niðurstöðu.

Þegar flugeldunum var skotið inn á völlinn á 15. mínútu í gær brá leikmönnum eðlilega mikið. Þeir fóru ekki í neinu óðagoti en hættu að spila og héldu inn í búningsherbergi. Þónokkrir áhorfendur flúðu líka hræddir úr stúkunni.

Atvikið má sjá hér fyrir neðan.