Beina því til Storytel að gæta var­úðar í markaðs­setningu

Í tilkynningu frá Samkeppniseftirlitinu kemur fram að það hafi haft til skoðunar erindi frá hljóðbókaveitunni Sagnalandi þar sem kvartað var undan meintri misnotkun Storytel á markaðsráðandi stöðu.

Kynntu lægra tilboð en hefðbundin verðskrá sýndi

Sagnaland taldi þannig Storytel hafa brugðist við opnun þeirra með því að kynna mun lægra tilboð en samkvæmt hefðbundinni verðskrá fyrirtækisins. Sagnaland vísaði í sínu erindi til þess að Storytel væri markaðsráðandi á markaðnum og að aðgerðir fyrirtækisins væru til þess fallnar að skaða lítinn keppinaut sem væri að hefja starfsemi á íslenskum hljóðbókamarkaði.

„Þó að samkeppni sé alla jafna af hinu góða fyrir neytendur þá vakna spurningar um hvort svo ör og sértæk verðviðbrögð af hálfu markaðsráðandi aðila með yfir 50.000 notendur (sá eini á Íslandi) geti talist til ótilhlýðilegra viðskiptahátta, sérstaklega ef markmiðið er að hindra innkomu nýrra aðila á hljóðbókamarkaðinn,“ sagði í erindi þeirra.

Í tilkynningu Samkeppniseftirlitsins segir að þau hafi í kjölfarið sent Storytel bréf þar sem þeim var tilkynnt um skoðunina og óskað eftir upplýsingum frá þeim og sjónarmiðum. Samkeppniseftirlitið benti á í sínu bréfi að afleiðingar undirverðlagningar markaðsráðandi fyrirtækis geti verið að veikari keppinautar sjái ekki ástæðu til að taka þátt í samkeppni og geti neyðst til að hætta starfsemi. Sérstaklega alvarlegt þyki þegar fyrirtæki með áberandi sterka stöðu á markaði beitir undirverðlagningu í tengslum við innkomu nýs samkeppnisaðila sem er að reyna að ná fótfestu á markaði.

Í svari Storytel kom svo fram að fyrirtækið teldi sig ekki vera markaðsráðandi og hafnaði því að umrætt tilboð, sem hafi beinst að takmörkuðum hópi fyrrum áskrifenda, hafi falið í sér skaðlega undirverðlagningu.

Ekki forsendur fyrir bráðabirgðaákvörðun

Að lokum segir að Samkeppniseftirlitið telji ekki, á þessu stigi, forsendur til að taka bráðabirgðaákvörðun vegna málsins en við mat á því var, meðal annars, litið til þess að umrætt tilboð hafi ekki sérstaklega beinst að innkomu Sagnalands á markað.

Samkeppniseftirlitið brýnir þó fyrir Storytel að huga að stöðu sinni á markaðnum og gæta sérstakrar varúðar í markaðssetningu og tilboðum til viðskiptavina á samkeppnislega viðkvæmum tíma þegar nýr aðili reynir að ná fótfestu á markaði.

Að lokum segir að Samkeppniseftirlitið kunni að taka málið til frekari rannsóknar á síðari stigum. Samkeppniseftirlitið hefur auk þess háttsemi Storytel til rannsóknar í öðru máli, þar sem meðal annars er til skoðunar hvernig skilgreina beri þá markaði sem Storytel starfar á.

Ákveðið var að rannsaka Storytel eftir að kvörtun barst frá Rithöfundasambandi Íslands um misnotkun á markaðsráðandi stöðu. Í kvörtuninni segir að RSÍ telji að hljóðbækur sem gefnar eru út af Storyside auk annarra útgáfna tengdum fyrirtækinu sé forgangsraðað yfir aðrar bækur. Til að mynda séu hljóðbækur Storyside í sérstökum forgangi í framsetningu og efnisvali í streymisveitunni og fái þar af leiðandi meiri hlustun.