New York Knicks í úr­slitin í fyrsta sinn á þessari öld

Knicks eru þar með komnir í úrslitaeinvígi NBA deildarinnar í fyrsta sinn síðan árið 1999.

Sömuleiðis á New York nú eitt af aðeins fjórum liðum í sögu úrslitakeppninnar sem hefur unnið ellefu leiki í röð, samkvæmt ESPN. Síðasta liðið sem gerði það var Golden State Warriors, sem vann fimmtán leiki í röð á leið sinni að titlinum árið 2017.

Sigurinn í nótt var unninn með yfirburðum en byrjunarliðsmenn Knicks voru sestir á bekkinn þegar tæpar átta mínútur voru enn eftir af leiknum. Knicks voru þá með 35 stiga forystu og alla stemninguna með sér, þrátt fyrir að vera á útivelli.

Karl Anthony-Towns var stigahæstur með 19 stig auk 14 frákasta. Landry Shamet fylgdi honum eftir með 16 stig af bekknum en Mikal Bridges og Jalen Brunson skoruðu sitt hvor 15 stigin.

Patrick Ewing var aðalmaðurinn síðast þegar Knicks komust í úrslit, árið 1999, og Walt „Clyde“ Frazier var aðalmaðurinn þegar Knicks urðu síðast meistarar, árið 1973.

Það var því viðeigandi að þeir tveir afhentu Knicks deildarmeistaratitil austursins í nótt og sendu liðið af stað í úrslitaeinvígið. Þar munu Knicks mæta annað hvort San Antonio Spurs eða Oklahoma City Thunder en staðan er 2-2 milli þeirra í úrslitum vestursins.