Gísli Þor­geir tryggði Magdeburg þýska meistara­titilinn

Magdeburg þurfti bara jafntefli í toppslagnum gegn Flensburg en tókst að knýja fram sigur eftir hádramatískan leik í 31. umferð. 

Ómar Ingi Magnússon, Elvar Örn Jónsson og Gísli Þorgeir Kristjánsson fögnuðu allir meistaratitlinum með Magdeburg í kvöld, þó þrjár umferðir séu eftir af þýsku deildinni.

Ómar Ingi og Elvar Örn skoruðu sitt hvor þrjú mörkin en Gísli Þorgeir lét mest til sín taka og var markahæstur með sex mörk.

Leikurinn var hörkuspennandi en það leit út fyrir að Magdeburg myndi tapa þegar Flensburg tók tveggja marka forystu undir lokin. Þá tók Gísli Þorgeir sig hins vegar til og skoraði mark sem minnkaði muninn.

Gísli fiskaði svo víti í næstu sókn Magdeburg og Philip Weber jafnaði úr vítaskotinu. 

Lokamínútan var síðan alveg ævintýraleg. 

Flensburg fékk tvö tækifæri til að taka forystuna á ný. Í fyrra skiptið var skotið frá Flensburg varið, en svo skaut Albin Lagergren í stöngina fyrir Magdeburg. 

Lagergren bætti síðan upp fyrir stangarskotið og stal boltanum af Flensburg í lokasókn leiksins. Hann gleymdi sér hins vegar í fagnaðarlátunum og kom boltanum ekki í mark Flensburg fyrir lokaflautið.

Magdeburg varð þar með Þýskalandsmeistari í þriðja sinn á sex árum og getur bætt Meistaradeildinni við titlasafn tímabilsins þegar úrslitahelgin fer fram í júní. Þýski bikarinn fór hins vegar til Fuchse Berlin fyrr á tímabilinu svo þrennan er ekki á leiðinni.