Búið spil hjá Elvari og fé­lögum

Elvar setti niður tvo þrista í röð og kom Anwil í 77-71 gegn Dabrowa Górnicza í kvöld, þegar tæpar þrjár mínútur voru eftir, en þá svöruðu gestirnir með átta stigum í röð og komust yfir, og reyndust sterkari á lokakaflanum.

Anwil hafði hfanað í 7. sæti deildarinnar og rétt misst af öruggu sæti þeirra sex sem komust beint í úrslitakeppnina. Í staðinn fór liðið í umspil og byrjaði á að mæta Zastal, liðinu í 8. sæti, á föstudaginn en tapaði þar 86-71 á heimavelli.

Annað tækifæri fólst svo í leiknum í kvöld við Dabrowa Górnicza, sem unnið hafði leik liðanna í 9. og 10. sæti, en Anwil endaði á að tapa naumlega, 87-84, og er því úr leik.

Elvar gerði sitt til að reyna að koma Anwil í úrslitakeppnina og setti til að mynda niður fjögur af tíu þriggja stiga skotum sínum. Hann endaði með 14 stig, þriðji stigahæstur, og flestar stoðsendingar eða sex talsins, hjá Anwil.