Kunni betur á moppuna og fagnaði sigri

Towns og félagar í New York Knicks unnu 108-102 sigur í gær og eru því komnir í 2-0 í einvígi sínu við Philadelphia, í NBA-deildinni í körfubolta.

Það vakti sömuleiðis mikla kátínu í höllinni þegar Towns kom til bjargar eftir að boltinn festist á bakvið aðra körfuna, þegar spennan var mikil í þriðja leikhluta. 

Drummond tók við moppu og reyndi ítrekað að losa boltann en án árangurs, á meðan að stuðningsmenn Knicks bauluðu. Þeir fögnuðu svo ákaft þegar Towns tók við moppunni og losaði boltann strax.

Leikurinn var afar spennandi og skiptust liðin á forystunni alls 25 sinnum, oftar en í nokkrum leik í úrslitakeppninni síðustu ellefu ár.

Jalen Brunson fór fyrir Knicks og skoraði 26 stig, þar af átta í lokaleikhlutanum, og Towns skoraði 20 stig og tók 10 fráköst. Philadelphia var án Joel Embiid vegna meiðsla en Tyrese Maxey var stigahæstur í liðinu með 26 stig. Vonir standa til að Embiid geti spilað næsta leik, á föstudaginn.

Wembanyama sterkur í stórsigri

Í vesturdeildinni jöfnuðu San Antonio Spurs einvígi sitt við Minnesota Timberwolves, 1-1, með algjörum stórsigri, 133-95.

Victor Wembanyama var að vanda í aðalhlutverki en hann skoraði 19 stig og tók 15 fráköst fyrir Spurs sem að héldu Minnesota í 35 stigum í fyrri hálfleik og voru 59-35 yfir að honum loknum.