Tekjur um þrettán milljarðar á fyrsta árs­fjórðungi

Félagið gerir ráð fyrir að aðlöguð EBITDA verði á bilinu 180-220 milljónir dollara. Lægri mörk afkomuspárinnar gera ráð fyrir engum tekjum af nýjum lyfjum í Bandaríkjunum á árinu 2026. Frá þessu er greint í fyrsta ársfjórðungsuppgjöri félagsins á þessu ári. 

Alvotech er líftæknifyrirtæki stofnað af Róberti Wessman sem einbeitir sér að þróun og framleiðslu líftæknihliðstæðulyfja fyrir sjúklinga um allan heim.

Þar kemur einnig fram að aðlöguð EBITDA1 hafi numið 24,4 milljónum dollara og framlegð af heildartekjum var 57 prósent.

„Á liðnum ársfjórðungi náðum við ýmsum stefnumarkandi áföngum, undirbjuggum að senda inn að nýju umsóknir um markaðsleyfi í Bandaríkjunum, tókum mikilvæg skref í markaðssetningu og þróun nýrra hliðstæðna og unnum að markvissum endurbótum á framleiðsluaðstöðunni,“ segir Lisa Graver, forstjóri Alvotech, í tilkynningu með uppgjörinu.

Hún segir að undanfarna mánuði hafi þau endurbætt fjölmörg gæða- og framleiðslukerfi félagsins.

„Við tókum meðvitaða ákvörðun um að eyða meiri tíma í þessar aðgerðir til að draga enn frekar úr þeirri áhættu að úttektir á framleiðsluaðstöðunni hefðu áhrif á reksturinn. Við vildum einnig tryggja að þegar við sendum inn umsóknirnar að nýju til Matvæla- og lyfjaeftirlits Bandaríkjanna (FDA) svari þær fyllilega öllum kröfum eftirlitsins. Endurbæturnar stuðla jafnframt að langtímavexti og verðmætasköpun félagsins,“ segir Lisa.

Þá segir hún að heildartekjur og EBITDA-framlegð á fyrsta ársfjórðungi endurspegli að hægja þurfti á framleiðslu á meðan úrbætur á framleiðsluaðstöðunni fóru fram.

„Við búumst við að tekjur af vörusölu aukist þegar framleiðslan kemst aftur í eðlilegt horf. Á viðskiptahliðinni verðum við vör við mikla undirliggjandi eftirspurn eftir öllum hliðstæðum okkar sem eru á markaði, þar á meðal fer eftirspurn enn vaxandi eftir hliðstæðunni við Humira í Bandaríkjunum.

„Við náðum einnig mikilvægum áföngum í lyfjaþróun, þar á meðal lögðum við inn umsókn um markaðsleyfi í Evrópu fyrir fyrirhugaða hliðstæðu við Entyvio og tókum inn fyrstu sjúklingana í lykilrannsókn á klínískri virkni og öryggi fyrirhugaðrar hliðstæðu við Eylea í háum styrk.

„Í dag tilkynntum við um samstarfssamning við FUJIFILM Biotechnologies um framleiðslu á nokkrum þeirra hliðstæðna sem við erum með á markaði og í þróun. Þetta treystir enn frekar framleiðslukeðjuna og dreifir áhættu, sem mun auðvelda næstu skref í markaðssetningu. Við leggjum ríka áherslu á að senda inn að nýju umsóknir um markaðsleyfi til FDA á þessum ársfjórðungi. Þær aðgerðir sem ráðist hefur verið í síðan á síðasta ári gera þessar umsóknir traustari en bæta einnig alla aðstöðu okkar fyrir framleiðslu og þróun nýrra hliðstæðna. Með endurbótunum verðum við því enn betur búin undir næsta vaxtarskeið í sögu félagsins.“

Stjórnendur félagsins kynna uppgjörið í beinu streymi sem hefst klukkan tólf á morgun, fimmtudaginn 7. maí. Hér verður streymi af fundinum. 

Ítarlegri tilkynning á ensku sem veitir nánari upplýsingar um fjárhag og rekstur á fyrsta ársfjórðungi 2026 er birt hér undir liðnum „Q1 2026 Earnings Call“.