Fór úr fingurlið og menn gátu ekki horft

Vanderbilt meiddist í öðrum leikhluta þegar hann reyndi að trufla troðslu Chet Holmgren en sló litla fingri utan í körfuboltaspjaldið. Við þetta fór fingurinn úr lið og Vanderbilt öskraði af sársauka á meðan hann hélt um höndina.

Hann stóð þá nálægt varamannabekk Oklahoma og þegar leikmenn þar sáu fingurinn voru þeir fljótir að snúa sér undan.

„Hann er grjótharður. Fyrst Vando fann fyrir sársauka þá var strax ljóst að eitthvað hefði gerst. Svo, þetta sökkar,“ sagði LeBron James, liðsfélagi Vanderbilt, eftir leikinn.

Vanderbilt skoraði að meðaltali 3,6 stig og tók 4,4 fráköst á 13,2 mínútum með Lakers í einvíginu gegn Houston Rockets í fyrstu umferð úrslitakeppninnar. Hann hafði skorað tvö stig og tekið eitt frákast þegar hann meiddist í nótt en hélt kyrru fyrir í höllinni út leikinn þrátt fyrir meiðslin.

James var stigahæstur Lakers með 27 stig en Chet Holmgren skoraði 24 og tók 12 fráköst fyrir meistarana. Shai Gilgeous-Alexander og Ajay Mitchell skoruðu 18 stig hvor.

Luka Doncic er enn frá keppni vegna meiðsla og gæti einnig misst af leik tvö annað kvöld.

Pistons unnu fyrsta leik

Detroit Pistons komst einnig í 1-0 í einvígi sínu við Cleveland Cavaliers, með 111-101 sigri á heimavelli. Cade Cunningham skoraði 23 stig fyrir Detroit sem endaði á toppi austurdeildarinnar, og Tobias Harris skoraði 20. Hjá gestunum var Donovan Mitchell með 23 stig og James Harden 22 en hann tapaði boltanum sjö sinnum í leiknum.