Golfsveifla Sig­mundar Davíðs heldur hægri sinnuð

Sigmundur Davíð var staddur í Vestmannaeyjum á dögunum og birti myndband þar sem hann sagði Eyjamenn reiðubúna að slíta sig frá Íslandi og lýsa yfir sjálfstæði, skyldu landsmenn ákveða að ganga í Evrópusambandið. Til stendur að halda þjóðaratkvæðagreiðslu um aðildarviðræður að sambandinu í haust og hefur Sigmundur verið meðal fremstu talsmanna gegn þeim viðræðum.

Sigmundur sló á létta strengi og vísaði í frægt myndband af George W. Bush, fyrrverandi Bandaríkjaforseta, eftir að hann hafði komið skilaboðunum um Eyjar og ESB á framfæri og sagði: „Sjáið þið nú þetta dræv“ áður en hann tók golfhögg.

Þar vísaði hann til frægs augnabliks Bush frá 2002 þegar hann var í fríi í Maine en sat fyrir svörum blaðamanna eftir hryðjuverkaárás í Ísrael. Bush var þar alvarlegur og óskaði eftir því að allar þjóðir heims gerðu það sem þær gætu að stöðva hryðjuverkamennina, áður en hann beindi blaðamönnum að sveiflu sinni með sömu orðum: „Now watch this drive“.

Segja má að sveifla Bush sé heldur frambærilegri en sú hjá Sigmundi en atvinnukylfingurinn Haraldur Franklín Magnús greip myndband Sigmundar á lofti. Hann greindi sveifluna í þaula og veitti honum góð ráð í myndbandi sem hann birti á Facebook og Instagram.

Sigmundur hafi klikkað á því að færa þungann frá hægri fæti til þess vinstri við sveifluna.

„Þetta er flott baksveifla, en vantar kannski aðeins upp á vinstri olnbogann. (...) Svo kemur niðursveiflan. (...) Gallinn er að hann er með allan þungann á hægri fæti. (...) Þegar hann klárar sveifluna má sjá að þá er þunginn enn á hægri fæti. Þetta er allt í lagi golfsveifla en það gæti verið erfitt fyrir Sigmund að spila golf þar sem í golfi þarf aðeins að koma sér yfir á vinstri,“ segir Haraldur í myndbandinu sem má sjá að neðan.