Þórsarar gætu hætt: „Fyrir hvern erum við að standa í þessu starfi?“

Þór tefldi fram liðum í 1. deildum karla og kvenna á leiktíðinni sem nú er að ljúka. Karlaliðið hafnaði í þriðja neðsta sæti og var nálægt því að falla en kvennaliðið varð í 2. sæti og fór í umspil um að komast í Bónus-deildina en féll þar úr leik gegn Fjölni.

Tímabilið var einnig krefjandi utan vallar þar sem Þórsarar sáu sig knúna til að sleppa suðurför vegna veðurs, þegar kvennaliðið átti að mæta Selfossi á útivelli, en mættu ekki skilningi hjá KKÍ og urðu þar með að greiða sekt.

Andri Gylfason, starfandi formaður körfuknattleiksdeildar Þórs, segir í pistli á Facebook-síðu deildarinnar að nú séu ákveðin tímamót hjá félaginu. Fleiri hendur þurfi einfaldlega á dekk svo að hægt sé að halda áfram.

Boðað hefur verið til fundar 21. maí þar sem ræða á um það hvernig eða hreinlega hvort að meistaraflokkum Þórs í körfubolta verði áfram haldið úti. Ekki tókst að mynda nýja stjórn meistaraflokks á aðalfundi síðastliðinn sunnudag.

„Fyrir hvern erum við að standa í þessu starfi? Ef vilji samfélagsins er til að halda úti öflugu meistaraflokksstarfi, þá krefst það sameiginlegs átaks okkar allra, ekki örfárra stjórnarmanna. Það felur í sér aukna þátttöku, skýrari ábyrgð og meiri samvinnu allra sem koma að starfinu – stjórn, leikmanna, foreldra, stuðningsmanna og annarra velunnara félagsins,“ skrifar Andri.

Ljóst er að mikill sjónarsviptir yrði af Þórsurum ef allt færi á versta veg – félagi sem meðal annars getur státað sig af því að þar hófst til að mynda körfuboltaferill Tryggva Snæs Hlinasonar.

„Þrátt fyrir þær áskoranir sem við stöndum frammi fyrir er mikilvægt að horfa einnig til þess styrks sem býr í félaginu. Saga þess, samfélagið í kringum það og sá fjöldi fólks sem hefur lagt sitt af mörkum í gegnum tíðina sýnir að grunnurinn er og getur verið sterkur – og að með samstilltu átaki er hægt að byggja upp enn öflugra starf,“ skrifar Andri.