„Al­gjör­lega ó­við­unandi að senda mína leik­menn út í ó­vissuna“

Stjórnarmenn Þórs tóku þá ákvörðun að senda ekki liðið suður og ástæðan er slæmt ferðaveður. Mótanefnd Körfuknattleikssambands Íslands vildi samt ekki fresta leiknum en stjórn Þórs segist ekki vera tilbúin að senda leikmenn sína út í einhverja óvissu.

„Hvaða ábyrgð ber ég sem stjórnarmaður og sjálfboðaliði hjá mínu íþróttafélagi?“ spyr Ólafur Torfason í upphafi pistils síns.

„Í dag er staðan þannig að kvennalið Þórs í körfubolta á að spila leik á Selfossi. Strax í gær var byrjað að vara við ferðum milli landshluta vegna veðurs og núna er búið að aflýsa öllu flugi. Jú, heiðarnar eru reyndar opnar en víða óveður á milli Reykjavíkur og Akureyrar,“ skrifar Ólafur.

„Staðan er því þannig að það er algjörlega óviðunandi að senda mína leikmenn út í óvissuna um hvort þær komist á leiðarenda til að spila sinn leik og með óvissu um hvenær þær komist til baka með tilheyrandi kostnaði fyrir félagið,“ skrifar Ólafur en hann segir að svörin frá KKÍ séu að ef liðið mæti ekki til leiks þá verði félagið sektað um nokkur hundrað þúsund krónur.

„Valið okkar í stjórninni er einfalt. Við ætlum ekki að senda okkar leikmenn út í einhverja óvissu vitandi það að ferðaskilyrðin eru mjög slæm á landinu. Ég ætla ekki að hafa það á minni samvisku ef eitthvað kæmi fyrir mína leikmenn og borga því frekar sekt upp á einhverja hundrað þúsund krónur en að senda þá út í óvissuna. Það er ekkert ferðaveður eins og staðan er núna,“ skrifar Ólafur eins og sjá má hér fyrir neðan.