Þórarinn dæmdur fyrir markaðsmisnotkun

Almar Möller verjandi Þórarins segir dóminn mjög mikil vonbrigði og honum hafi þegar verið áfrýjað til Landsréttar.

Varðaði fjölda viðskipta með bréf í Kviku

Dómurinn hefur ekki verið birtur og því liggja forsendur hans ekki fyrir að svo stöddu en í ákæru á hendur Þórarni kom fram að markaðsmisnotkunin hafi farið fram árið 2020 á um tveggja mánaða tímabili og að hann hafi í 71 skipti lagt fram viðskiptafyrirmæli um kaup á hlutabréfum í Kviku banka hf. sem voru líkleg til að gefa ranga eða villandi mynd af eftirspurn og verði hlutabréfanna. 

Þórarinn var á þeim tíma einn stærsti einkafjárfestirinn í Kviku ásamt viðskiptafélaga sínum í gegnum IREF.

Viðskiptin hefðu aldrei hækkað gengið um meira en 1,5 prósent

Þórarinn taldi fullyrðingar ákæruvaldsins um sekt hans á sandi byggðar, líkt og Vísir fjallaði um á dögunum.

Í greinargerð hans kom meðal annars fram að viðskipti hans með bréf í Kviku hafi numið 0,14 prósentum af heildarviðskiptum á ákærutímabilinu, þróun gengis félagsins hefði verið í takt við þróun gengis Arion banka á tímabilinu og hann hefði ekki reynt að hafa áhrif á dagslokagengi Kviku. Viðskipti hans með bréf í félaginu hefðu aldrei hækkað gengið um meira en 1,5 prósent, sem væri langt undir öllum viðmiðunarmörkum.

Fréttin hefur verið uppfærð.