„Ég held að ég verði þess heiðurs að­njótandi að taka Kúbu“

New York Times greindi frá því í gær að Bandaríkjastjórn hefði krafist þess að forsetinn Miguel Díaz-Canel afsalaði sér embættinu.

„Að taka Kúbu... Ég meina, hvort ég frelsa hana, tek hana. Ég held að ég geti gert hvað sem ég vil við hana,“ sagði Trump í gær. „Þjóðin er mjög veik fyrir núna.“

Rafmagnsleysi hefur verið viðvarandi vandamál á Kúbu, þar sem inniviðir hafa grotnað niður. Bandaríkjastjórn hafa hins vegar gert illt verra með því að hafa í hótunum við alla þá sem selja Kúbu olíu. Hún hefur krafist þess að stjórnvöld á Kúbu opni hagkerfið og sleppi öllum pólitískum föngum.

NBC birti myndskeið í gær þar sem aðstoðarforsætisráðherra Kúbu, Oscar Pérez-Oliva Fraga, sagði stjórnvöld reiðubúin til að greiða fyrir fjárfestingum og viðskiptum við Bandaríkin.

Samningar náðust um fjárfestingar bandarískra aðila á Kúbu í stjórnartíð Barack Obama en kerfið á Kúbu átti erfitt með að aðlagast og þegar Trump tók við dró hann í land.

Stjórnvöld vestanhafs eru sögð vilja bíða með að greiða fyrir fjárfestingum á Kúbu, þar til þarlend stjórnvöld hafa sýnt fram á að þau séu raunverulega reiðubúin til að ráðast í breytingar.