Slógu í gegn með dansi áður en mars-geðveikin hefst

Það styttist óðum í að „mars-geðveikin“ svokallaða hefjist um miðjan þennan mánuð, þegar úrslitakeppnin í bandaríska háskólakörfuboltanum fer af stað.

Kvennalið UCLA er sigursælt og aldrei að vita nema að það keppi um titilinn og þá er ljóst að leikmenn, sérstaklega þrír þeirra, munu stíga sigurdans af miklum móð.

Þær Charlisse Leger-Walker, Gabriela Jaquez og Lauren Betts sýndu nefnilega mikil tilþrif í óvænta dansatriðinu í hálfleik á leik karlaliðs UCLA við Nebraska í síðustu viku. Atriðið má sjá hér að neðan.

Aðdragandinn að þessu var sá að Leger-Walker birti myndband á Youtube-síðu sinni, með Jaquez, þar sem þær skoruðu á UCLA-dansliðið að kenna þeim heilan dans á aðeins 24 klukkutímum. Leger-Walker lofaði svo að ef að myndbandið fengi 1.000 „like“ þá fengi hún liðsfélaga með sér í að dansa með dansliðinu í hálfleikssýningu á leik karlaliðsins. Það gekk strax eftir.

„Lauren og ég höfðum viljað taka danstíma í LA í langan tíma,“ sagði Jaquez við ESPN og bætti við:

„Við ólumst báðar upp við að dansa og elskum að dansa í búningsklefanum og svona. En þetta var ekki bara einhver TikTok dans, þetta var alvöru dæmi. Svo þegar að Charlisse kom með þessa hugmynd þá fórum við í þetta af fullum þunga.“

„Við höfðum bara einn dag til þess að æfa okkur svo við vorum að æfa fyrir framan spegilinn og undirbúa okkur eins og við gátum,“ sagði Jaquez og bætti við að í liðinu hennar væri lögð áhersla á að hafa gaman og það virðist hafa skilað sér í mjög góðu gengi í vetur.