Hefja ræðis­mannaþjónustu í land­töku­byggð á Vestur­bakkanum

Boðið verður upp á vegabréfsþjónustu fyrir bandaríska ríkisborgara í landtökubyggðinni Efrat á Vesturbakkanum á föstudaginn samkvæmt yfirlýsingu bandaríska sendiráðsins á samfélagsmiðlinum X, allsherjarforrtinu.

Á næstu mánuðum segir sendiráðið að stefnan sé að bjóða sambærilega þjónustu í Beitar Illit, annarri landtökubyggð gyðinga. Markmiðið segir það að reyna að ná til „allra Bandaríkjamanna“. Bandaríska sendiráðið hefur áður boðið upp á ræðismannaþjónustu í Ramallah og fleiri palestínskum byggðum á Vesturbakkanum.

Ísraelska utanríkisráðuneytið fagnaði áformunum og sagði þau söguleg. AP-fréttastofan segir að fulltrúa palestínskra yfirvalda hafi enn ekki brugðist við tíðindunum.

Ísraelar hernámu Vesturbakkann og austurhluta Jerúsalem í sex daga stríðinu svonefnda árið 1967. Rúmlega sjö hundruð þúsund Ísraelar búa nú á hernumdu svæðunum sem Palestínumenn gera tilkall til að verði hluti af framtíðarríki þeirra.

Afgerandi meirihluti alþjóðsamfélagsins telur landtökubyggðir gyðinga á hernumdu svæðunum ólöglegar og hindrun í vegi friðar fyrir botni Miðjarðarhafs.

Á fyrra kjörtímabili Donalds Trump sem Bandaríkjaforseta færði hann bandaríska sendiráðið frá Tel Aviv til Jerúsalem. Ísraelar líta sjálfir á Jerúsalem sem höfuðborg sína en fæst ríki heims viðurkenna hana sem slíka. Allsherjarþing Sameinuðu þjóðanna samþykkti ályktun þar sem skorað var á Bandaríkjastjórn að draga þá ákvörðun til baka.