„Hann er ekki á ein­hverju klinki hérna“

„Ég er ekki búinn að sjá neitt frá þessum leikmanni ennþá. Ég var dálítið hrifinn af Ivan og fannst hann koma með vissa hluti inn í Tindastólsliðið. Hann gat skotið boltanum, góð þriggja stiga skytta, og í bestu leikjum Tindastóls í vetur fannst mér hann vera stór partur af því,“ sagði Teitur.

Dolenc er búinn að spila einn bikarleik og einn deildarleik. Hann skoraði fjögur stig á tíu mínútum gegn Ármanni á föstudaginn, tók eitt frákast og gaf eina stoðsendingu.

Umræðuna frá því í Körfuboltakvöldi á föstudaginn má sjá hér að neðan.

„Ég skil þessi skipti ekki ennþá en það getur vel verið að hann eigi eftir að stíga upp og sýna okkur eitthvað,“ sagði Teitur og Benedikt Guðmundsson var á sama máli:

„Vonandi fyrir Stólana þá býr meira í honum. Hann þarf að gera meira en hann hefur verið að gera hérna í byrjun. Hann spilar tíu mínútur í þessum leik og tíu mínútur í þeim síðasta. Kannski er það bara það sem þeir eru að leita að. Einhvern til þess að rétt leysa af í nokkrar mínútur og gera ekki mistök.“

Stefán Árni Pálsson benti þá á að í þeirri svakalegu baráttu sem fram undan er um Íslandsmeistaratitilinn mættu Stólarnir ekki við því að Dolenc væri eitthvað flopp.

Langt frá því að vera nógu gott ef hann fær 5.000 evrur í laun

„Maður verður líka að horfa á hvað þeir fá borgað,“ sagði Benedikt sem þekkir vel til á Króknum eftir að hafa þjálfað þar.

„Ég get sem þjálfari ekki gert sömu kröfur til leikmanns sem er með 1.500 evrur og til leikmanns sem er með 8.000 evrur. Ég veit ekkert hvaða samning hann er með. En ef hann er með 5.000 evrur eða meira þá er þetta náttúrulega langt frá því að vera nægilega gott. En ef hann er að fá eitthvað klink og á að vera í litlu hlutverki, þá getur maður ekkert verið að gagnrýna hann. Ég er nokkuð viss um að hann sé ekki á einhverju klinki hérna. Ég þykist vita að þeir vilji og búist við meiru frá honum.“