LeBron James elstur til að ná þre­faldri tvennu

James var með 28 stig og 12 stoðsendingar þegar hann tók sitt tíunda frákast þegar rétt rúmar tvær mínútur voru eftir af leiknum í 124-104 sigri Lakers. James fékk standandi lófaklapp þegar hann fór af velli augnablikum eftir að hafa náð síðasta frákastinu og fullkomnað sína 123. þreföldu tvennu á ferlinum, sem er fimmti mesti fjöldi í sögu NBA.

James, 41 árs og 44 daga gamall, sló met Karls Malone, sem náði þrefaldri tvennu fyrir Lakers þegar hann var 40 ára og 127 daga gamall.

Stigahæsti leikmaður í sögu NBA hafði ekki náð þrefaldri tvennu síðan 1. febrúar 2025 í New York. Sá dagur er betur þekktur í sögu Lakers fyrir fréttirnar seint um kvöldið af leikmannaskiptunum sem færðu Luka Doncic til Lakers í gríðarlegum skiptum fyrir Anthony Davis.

Malone átti metið lengi

Malone hafði haldið metinu sem elsti leikmaðurinn með þrefalda tvennu síðan hann náði 10 stigum, 11 fráköstum og 10 stoðsendingum þann 28. nóvember 2003, á sínu síðasta tímabili í NBA. James náði næstu fimmtán þreföldu tvennunum á þeim lista og hann komst ítrekað nálægt því að setja metið á síðasta ári, en náði því ekki alveg fyrr en í síðasta leik Lakers fyrir stjörnuhelgina.

Eftir að hafa misst af leiknum á þriðjudag gegn San Antonio var James ákveðinn og virkur frá upphafskasti gegn Mavericks í fjarveru Doncic. Stigahæsti leikmaður NBA missti af sínum fjórða leik í röð fyrir Lakers vegna vægrar tognunar aftan í læri.

James skoraði 14 stig og gaf sex stoðsendingar í fyrsta leikhluta og var kominn með 18 stig, átta stoðsendingar og fjögur fráköst í hálfleik. Hann náði tveggja stafa tölu í stoðsendingum í þriðja leikhluta og spilaði allan fjórða leikhlutann áður en hann náði 10. frákastinu.

Valinn í sinn 22. stjörnuleik

James var valinn í sinn 22. stjörnuleik um helgina í Intuit Dome, þrátt fyrir að hafa misst af átján leikjum á þessu tímabili vegna meiðsla. Það þýðir að James kemur ekki til greina fyrir verðlaun leiktíðarinnar eins og að vera valinn í úrvalslið þar sem hann hefur verið á 21. tímabili í röð.

Fyrir þennan leik var James með 21,8 stig, 6,9 stoðsendingar og 5,7 fráköst að meðaltali fyrir Lakers, sem eru í miðri baráttunni um sæti í úrslitakeppni Vesturdeildarinnar þrátt fyrir að hafa aðeins spilað 10 leiki þar sem James, Doncic og Austin Reaves voru allir heilir á sama tíma. James missti af fyrstu 14 leikjum tímabilsins vegna bakverkja.

Að meðtöldum úrslitakeppninni hefur James náð 152 þreföldum tvennum á ferlinum.