Rifust um Trump áður en faðir skaut dóttur sína til bana

BBC greinir frá málinu í gær og vitnar í rannsóknargögn um dánarorsök.

Lucy Harrison er sögð hafa verið í heimsókn hjá föður sínum, Kris Harrison, í Texas og að fyrr sama dag og hún var skotin til bana hafi feðginin átt í rifrildi um Bandaríkjaforseta. Lögregla hafi rannsakað málið sem manndráp, en ekkert sakamál hafi verið höfðað gegn Kris þar sem dómstóll hafi neitað að ákæra hann, eins og því er lýst í umfjöllun BBC.

Í rannsóknargögnum um dánarorsök sé að finna vitnisburð Sam Litter, kærasta Lucy, sem hafi lýst „stóru rifrildi“ um Trump sem á þeim tíma var að búa sig undir að taka við embætti Bandaríkjaforseta öðru sinni.

Litter sem var með Lucy Harrison í för þegar þau heimsóttu fjölskyldu hennar yfir hátíðarnar segir að kærasta sín hafi oft verið leið í garð föður síns þegar hann talaði um að hann ætti byssu. Þá herma gögn málsins einnig að Kris Harrison hafi flutt til Bandaríkjanna þegar dóttir hans var barn og að hann hafi sótt áfengismeðferð vegna fíknar. Hann hafi með yfirlýsingu viðurkennt að hafa fallið á áfengisbindindi daginn sem dóttir hans lést.

Litter segir að um morguninn 10. janúar í fyrra að kærastan hans spurt föður sinn þegar þau rifust um Trump „hvernig myndi þér líða ef ég væri stelpan í þessum aðstæðum og það hafi verið brotið á mér kynferðislega?“

Faðirinn hafi svarað á þá leið að hann ætti tvær aðrar dætur sem byggju hjá honum, svo það myndi ekki valda honum neitt miklu uppnámi. Dóttirin hafi verið mjög miður sín og hafi hlaupið upp á efri hæð hússins. Síðar sama dag, um hálfri klukkustund áður en parið ætlaði að leggja af stað út á flugvöll, hafi Lucy verið í eldhúsinu þegar faðir hennar hafi sótt hana og leitt hana inn í svefnherbergi á jarðhæðinni. Síðan segist Litter hafa heyrt háværan hvell og svo hafi faðirinn Kris öskrað eftir konu sinni, Heather.

Sjálfur lýsir faðirinn atburðarrásinni á nokkuð annan veg, en hann segist hafa ætlað að sýna dóttur sinni byssuna eftir að þau hafi horft saman á fréttir um glæpi með skotvopn. Hann hafi tekið Glock 9 millimetra hálfsjálfvirka handbyssu úr skáp inni í herbergi en þegar hann hafi lyft byssunni hafi hann allt í einu heyrt háan hvell. „Ég skildi ekki hvað gerðist. Lucy féll allt í einu niður,“ er haft eftir Kris um atburðinn. Sjálfur segist hann ekki muna hvort fingur hans hafi snert gikkinn.