Inn­kalla ungbarnakex vegna að­skota­hluta

Matvælastofnun (MAST) greinir frá því í tilkynningu að stofnuninni hafi borist upplýsingar um innköllun á Gerber biscuits Arrowroot ungbarnakexi vegna aðskotahluta sem hefðu fundist. 

Innflytjandi Smartco ehf. hefur í samráði við heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness (HEF) innkallað vöruna. 

Neytandi hafi haft samband við heilbrigðiseftirlitið með áhyggjur eftir að hafa lesið um innköllunina á bandarískum miðlum, segir í tilkynningu MAST. 

Samkvæmt Fox óskaði Gerber eftir því að varan yrði innkölluð vegna tilkynninga um hugsanlega plast- eða pappírsaðskotahluti í vörunni.

Framleiðandi kexins er Nestlé S.A. og var það í dreifingu í verslun Kosts að Miðhrauni 2. Fleiri verslanir eru ekki tilgreindar í tilkynningu MAST.

Innköllunin á við um allar þær vörur sem hafa „best fyrir“ dagsetningar á tímabilinu 16. október 2026 til 16. desember 2026.