Segir Grikkjanum haldið í gíslingu

Félagaskiptaglugginn í deildinni lokast í kvöld og hefur orðrómur verði uppi um risaskipti sem fælu í sér að Antetokounmpo færi frá Bucks. Nú er ljóst að ekkert verður af þeim í dag og að Grikkinn heldur kyrru fyrir út þessa leiktíð, samkvæmt Shams Charania hjá ESPN.

Antetokounmpo glímir við meiðsli í kálfa og óvíst hvenær hann snýr aftur til keppni. Hann hefur tvívegis verið valinn MVP, eða verðmætasti leikmaður, NBA-deildarinnar og er sagður vilja komast í burtu frá Bucks sem eru aðeins í 12. sæti austurdeildarinnar og ekki á leið í úrslitakeppnina sem stendur.

Tilraunir hans til að komast í burtu – lið á borð við Golden State Warriors, Minnesota Timberwolves, Miami Heat og New York Knicks hafa verið nefnd í þessu samhengi – hafa hins vegar ekki borið árangur.

„Giannis er að reyna að sýna kurteisi í þessu. Hann hefur rætt við þetta fólk bakvið luktar dyr og látið vita að hann vilji skipti. Af hverju láta þeir ekki verða af því?“ spurði Kendrick Perkins, fyrrverandi NBA-leikmaður, í NBA Countdown á ESPN og var reiður yfir stöðunni sem Grikkinn er í.

„Milwaukee Bucks ber ábyrgð á þessu. Það þarf einhver að hringja í lögregluna. Ég vil fá rannsókn vegna þess að það er verið að halda þessum manni í gíslingu,“ sagði Perkins og taldi það ekki eiga að bitna á Antetokounmpo að hann færi ekki í drastískar aðgerðir til að losna frá sínu félagi.