Upp­sagnir hjá Ís­lenskri erfða­greiningu: „Gríðar­lega erfiður dagur“

„Þetta er búið að vera gríðarlega erfiður dagur. Það er mjög erfitt að sjá á eftir því öfluga starfsfólki sem fékk tilkynningu um uppsögn í dag. Ástæðan fyrir þessari breytingu er að móðurfélag Íslenskrar erfðagreiningar, Amgen, er búið að vera að endurskipuleggja og gera áherslubreytingar á rannsóknarsviði sínu á heimsvísu. Þetta hefur áhrif á mjög margar starfsstöðvar Amgen víða um heim, þar á meðal á Íslandi,“ segir Unnur Þorsteinsdóttir, meðframkvæmdastjóri Íslenskrar erfðagreiningar. 

Verkefni á borð við Íslendingabók halda sínum dampi en breytingar verða á áherslum fyrirtækisins.

„Það verður breyting á rannsóknarfókusnum, það er ekki alveg búið að ákveða hvar, en það á eftir að slípa þetta svolítið til,“ segir Unnur. ,

Ekki verið að slíta fyrirtækið í sundur

Kári Stefánsson, stofnandi Íslenskrar erfðagreiningar, hætti sem forstjóri í maí í fyrra. Í viðtali um starfslokin sagðist hann hafa áhyggjur af því að Amgen myndi gleypa fyrirtækið og spýta því út. Unnur segir þetta ekki lið í því.

„Við erum við stjórnina hér,“ segir Unnur. 

Svövu Sigrúnu Sigurðardóttur var sagt upp eftir 29 ára starf hjá fyrirtækinu og náði fréttastofa stuttu tali af henni fyrir utan höfuðstöðvarnar rétt eftir hádegi í dag. Hún segir þetta erfiðan dag.

Kom þetta flatt upp á þig?

„Ekki þegar það er verið að segja upp, þá eru bara allir undir. Það er bara þannig,“ segir Svava Sigrún Sigurðardóttir. 

Hvernig var andinn inni eftir að þetta var tilkynnt?

„Bara eins og við er að búast,“ segir Svava.