Heiða tekur annað sætið í Reykja­vík

Frá þessu greinir Heiða í færslu á Facebook nú fyrir stundu. Heiða greindi frá því eftir að niðurstaða lá fyrir á laugardaginn að hún muni taka sér smá tíma til að melta niðurstöðuna og ræða við sitt fólk, áður en hún tæki ákvörðun um hvort hún myndi þiggja sætið, og nú hefur hún gert upp hug sinn.

„Ég vil þakka öllum þeim studdu mig í forvali Samfylkingarinnar um liðna helgi. Ennfremur vil ég þakka, frá mínum dýpstu hjartarótum, þeim fjölmörgu sjálfboðaliðum sem störfuðu með mér í aðdraganda forvalsins. Þó að niðurstaðan hafi verið mér vonbrigði þá finn ég til mikils þakklætis fyrir allan stuðninginn, óteljandi símtöl, greinar og skilaboð frá félögum og vinum á liðnum vikum og dögum. Það er gott að eiga góða að og hvatning ykkar síðustu daga hefur snert mig djúpt,“ segir Heiða meðal annars í færslunni.

Þá ítrekar hún hamingjuóskir sínar til Péturs Marteinssonar sem hafði betur en Heiða í baráttunni um oddvitasætið. Þá þakkar hún öðrum meðframbjóðendum sínum fyrir baráttuna og óskar öllum þeim sem tryggðu sér sæti til hamingju með árangurinn.

„Eftir samráð og samtöl við mína nánustu, stuðningsfólk og samstarfsólk í okkar samhenta meirihluta í borgarstjórn hef ég ákveðið að þiggja það sæti sem ég var kjörin í. Það er niðurstaða mín að þannig geti ég best áfram unnið jafnaðarstefnunni, jafnréttinu og okkar pólitísku hugsjónum mest gagn. Þátttakan í prófkjörinu sýnir slagkraft Samfylkingarinnar í borginni og niðurstaðan er mikil endurnýjun í bland við reynslumeiri frambjóðendur. Flokkurinn hefur valið og nú tekur vinnan við.

Ég mun að sjálfsögðu einnig halda áfram að gegna mínum skyldum sem borgarstjóri og borgarfulltrúi Samfylkingarinnar út þetta kjörtímabil samhliða kosningabaráttunni sem framundan er. Fram til sigurs – látum verkin tala!“ skrifar Heiða ennfremur.