Segist hafa grænt ljós frá Trump fyrir frekari refsiaðgerðum gegn Rússum

Í yfirlýsingu sem hann sendi út í gær sagðist Graham hafa átt langan skilvirkan fund með Trump og að Trump hefði veitt frumvarpinu samþykki sitt.

„Þetta er góður tími, þar sem Úkraínumenn eru að gefa ívilnanir og stefna að friði og Pútín gerir ekkert nema tala og heldur áfram að drepa saklaust fólk,“ sagði Graham.

Hann sagði að frumvarpið myndi gera Trump kleift að refsa ríkjum sem kaupa enn olíu af Rússlandi og fjármagna þannig stríðsrekstur Rússa. Sala á olíu og jarðgasi er langstærsta tekjulind rússneska ríkisins.

Graham vísaði sérstaklega til Kína, Indlands og Brasilíu og sagði að frumvarpið myndi gefa Trump mikið vogarafl gagnvart þeim til að fá ráðamenn þar til að hætta að kaupa olíu af Rússlandi.

Um tíma í fyrra þótti mögulegt að þingmenn gætu farið fram hjá Trump og gert frumvarpið að lögum án samþykkis hans.

Sjá einnig: Mun þingið fara fram hjá Trump?

Þá sagði hann mögulegt að atkvæðagreiðsla um frumvarpið gæti farið fram í næstu viku. Blaðamenn vestanhafs sem fjalla um þingið segja það hæpið. Mikið sé um að vera á þingi í næstu viku og segir einn blaðamaður að líklega verði ekki hægt að greiða atkvæði um frumvarpið fyrr en í fyrsta lagi í næsta mánuði.

Þá séu nokkrir þingmenn, og þá sérstaklega einn öldungadeildarþingmaðurinn Rand Paul, sem hafa lýst yfir andstöðu við frumvarpið og hótað að gera allt sem þeir geta til að standa í vegi þess.

Ekki í fyrsta sinn

Eins og áður segir eru nokkrir mánuðir síðan frumvarpið var fyrst samið. Síðan þá mun það hafa tekið nokkrum breytingum þar sem Graham og félagar hafa reynt að koma til móts við Trump og aðra í Hvíta húsinu. Eins og kemur fram í frétt Politico er þetta ekki í fyrsta sinn sem Graham segir frumvarpið á leið í gegnum þingið. Það hefur ekki raungerst í þeim tilfellum.

Talsmaður Grahams svaraði ekki fyrirspurn Politico um hvort frumvarpið hefði tekið umfangsmiklum breytingum og hvaða breytingar þær væru þá.

Frá því hann tók aftur við embætti forseta Bandaríkjanna hefur Trump ítrekað hótað því að beita Rússa hörðum refsiaðgerðum en lítið staðið við hótanir sínar. Í október beitti hann tvö stærstu olíufyrirtæki Rússlands refsiaðgerðum en eftirfylgni varðandi þær aðgerðir er talin hafa verið lítil.